O Círculo das Artes celebrará o vindeiro xoves 14 de maio, ás 19:00 horas, unha xornada especial con motivo das Letras Galegas, dedicada nesta ocasión á escritora e xornalista Begoña Caamaño.
O acto, que terá lugar no Salón de Columnas da entidade, renderá homenaxe á figura e á obra dunha das voces máis destacadas da literatura galega contemporánea, nunha velada concibida para poñer en valor a lingua e a cultura de Galicia.
A programación incluirá unha exposición conmemorativa, a lectura de diferentes textos vinculados á autora e a interpretación ao piano da emblemática peza “Negra Sombra”, nunha proposta cultural marcada pola emoción, a sensibilidade e a lembranza.
Con esta iniciativa, o Círculo das Artes súmase un ano máis á celebración das Letras Galegas, reafirmando o seu compromiso coa promoción e difusión da cultura galega.