Xa está aberta a inscrición para esta actividade, que se desenvolverá do 26 ao 28 de marzo, para nenos e nenas de 4 a 13 anos

Lugo. 12/marzo/2018

O Círculo das Artes de Lugo, seguindo o seu obxectivo de axudar á concialiación da vida familiar e laboral mediante a posta en marcha de actividades infantís, dá un paso máis aló coa organización dos primeiros campamentos urbanos para socios e socias, que se desenvolverán durante as vacacións de Semana Santa e que manterán a mesma dinámica que os realizados durante o período estival do pasado ano, dado o éxito logrado por esta iniciativa.

Os campamentos urbanos están dirixidos a nenos e nenas de 4 a 13 anos de idade e desenvolverase do 26 ao 28 de marzo, en horario de 10.00 a 14.00 horas, con posibilidade de entrada ás 09.00. O seu prezo é de 20 euros á semana e, do mesmo xeito que no verán, ofrécese un desconto pola inscrición do segundo irmán, que terá un prezo de 15 euros.

As actividades previstas abarcan desde as que se celebrarán nas salas do Espazo Novo como coreografías, teatro, xogos, talleres de gomaeva, modelaxe, plastilina,  reciclaxe e multideporte, adaptándoas sempre ás idades dos participantes, a outras no exterior, en función de que o tempo o permita.

As prazas son limitadas e determinaranse por rigorosa orde de inscrición. Estas pódense realizar desde hoxe, nas oficinas do Círculo, como sempre, en horario de tarde. Ditas inscripcións poderanse formalizar ata cinco días antes do inicio do campamento.